☆( عيشه صعبه )☆ ... بقلم / الشاعر مبروك علوه

☆( عيشه صعبه )☆

كفايه يادنيا متفتريش
إحنا مش عارفين نعيش
عايشين فيكي ذل وقهر
ومش لاقين رغيف العيش

العيشه صعبه وبقت نار
كل شويه ترفع الأسعار
ومحدش بيسئل فينا
وإلهم راكبنا ليل ونهار

غلوا علينا حتي السولار
وع البنزينه واقفين طابور
بنقف عليها بالساعتين
لما بيجى علينا الدور

رفعوا علينا سعر الدولار
كل شويه ف الصعود
ومش عارفين ناخد قرار
كل حياتنا بقت سدود

الغنى عايش ولا هموا
وكل حاجه بين إيديه
والغلبان بيمصوا ف دمه
ومين راح يسئل عليه

عايز تعيش خليك نمله
واحفر لك شق ف جدار
ومتفكرش تعلي صوتك
خليك بعيد عن الانظار

☆☆☆☆☆☆☆☆☆☆؛

مبروك علوه