سجال بين
عونى هشام - مصطفى تيسير
===========
------ ------مصطفى
و هز البخت غربالي
نزل حظي بكا و دموع
و قلمي إللي كان عالي
بيبدر كل يوم موضوع
خلاص مـ الحبر بقي خالي
خلاص يا دنيا مش مسموع
يا دنيا الزهر بيحابي
ما دقش مره علي بابي
تعالي و إسكني رحابي
و قولي الشعر شئ مشروع
أنا إللي قصايدي من فضه
تملي فـ إيدي تتوضى
هزيلة قصايدي صابها الجوع
يا خوفي بكره ألاقيها
قصايد ماشية فـ الممنوع
بقلم .. مصطفي تيسير
#مصطفي_تيسير
=============
------- -----عونى هشام
قصايد ماشيه ف الممنوع
وحرف كمان رماه الجوع
وانا عاصى مع قلمى
وقرارى صعب فيه رجوع
حروفى عاكسه فى التيار
وليلى شايفه زى نهار
وقلمى طويته ف الكراس
لكن حبرى كسيل انهار
حروفى كتير ماليها قرار
وعارف امتى انا باختار
عشان تيسير بيتكلم
بلاش اعند واشعلل نار
خلى البخت على حاله
مليش ف الخظ لو ماله
ومالى اعمل ايه ف بختى
اروح له يمشى على حاله
---/ وعحبى
--------
#عونى_هشام
==========+=+++
------ مصطفى تيسير
قصايد ماشية علي كيفها
و مش لاقيه إللي ينصفها
و بتدور علي رغيفها
فـ دينا تملي ماشية شمال
في دنيا بمبدأ إستغلال
ما بتشوفشي حرام و حلال
و مين فينا هيكشفها ؟
======#مصطفى_تيسير
==============
------------------- عونى هشام
حروف ترسمنا على كيفها
وناس ماشيه كده بكيفها
كله ماشى عكس عكاس
ما تعرف حق من زيفها
ناس فى يمين تروح لشمال
وناس بتغنى بالموال
ورجاله عقولها عيال
تقرف وانت بتشوفها
وبنت ماشيه ف البطال
وخلف الشات تشوف افعال
لا يوم قالت حرام وحلال
وفاكره ما حد يكشفها
وانا تايه مابين الاتنين
اشوف واسكت وقلبى حزين
بقول والدمع جوه العين
لو بايدى راح انسفها
بشوف افعال ماهيش ف الدين
تقول شياطين تقول ملاعين
ومش عارف راحين على فين
واقول يارب عدلها
واقول يارب عدلها
--------
#عونى_هشام
===============
-------------- مصطفى تيسير
بقول يا رب عدلها
و ألقي حروف و أعديلها
قصايد تبقي شئ هادف
و الاسفاف كدا فـ ديلها
زمان كان للحروف قيمة
مع الأشعار و فـ السيما
و كان للحرف بريمة
و ناس تسمع مراسيلها
أنا طالب أشوف الفن
منارة تبان معالمها
----- مصطفى تيسير
===============
--------------- عونى هشام
حروفى فين معالمها
وبيوتى فين منازلها
تعارك فيا طول يومى
ومش عارف انازلها
كأن حروفى م الماضى
بتحكمنى ومش فاضى
اشوفها ف شعر او حكمه
ارسمها وانا راضى
بروح وابعد عن الاسفاف
وعمر ف يوم ما كنت بخاف
نقدى لحاله بنعيشها
وابروزها بشكل غلاف
-------
#عونى_هشام
==============
اتا وتيسير بدون تقصير
نقول والحرف وياكم
بينا حب فيه تقدير
وعشق حروفنا لهواكم
===========
مصطفى تيسير - عونى هشام
ليست هناك تعليقات:
إرسال تعليق