لحظة الاحتضار
كلمات / رضا ابو الغيط
*********************
فتحوا الخليه بالنهار
والكل طار
عارف طريقه وسكته
الا الشباب
ذاق العذاب
وصابه داء انكسار
عايش تملى ف دُنيته
محصور ما بين
أمسه اللى عدى واتقضى
والفضا ..............
والانتظار.................
باصص لحبل المشنقه
ساجن حياته ف شرنقه
تايه مابين...........
ألفين قرار
خايف يفوق وبص فوق
رافض يدوق
كاس الحياه
ليكون أمر من المرار
ما هو داق كتير
لحظة ما كان
عاشق المكان
جوه الميدان
لحظة ما حب ف يوم يطير
خارج حدود الانهيار
لحظة ما يوم
حلمه انسرق
وخطه البيانى ع الورق
بقى ف انحدار
فتحوا الخليه بالنهار
والكل طار
الا الشباب
ذاق العذاب
ليل نهار
مربوط فى حزنه
بخيط وجع
وحبل مجدول بالفزع
ووشه متلون صفار
تاهت خطاوى سِكته
تاهت معالم ضحكته
داخل حدود اللا أمل
مستنى لحظة
الاحتضار.........
ليست هناك تعليقات:
إرسال تعليق